Бугун тунда ЕЧЛнинг илк чорак финал жуфтликлари майдонга тушади.
«Ювентус» (Турин, Италия) — «Реал Мадрид» (Мадрид, Испания) | «Ювентус» стадиони, Турин | 23:45 — UzReport каналида
Фото: insider.in
Бугун Туриндаги «Ювентус» стадионида А-серия пешқадами бианконерилар Ла-Лиганинг учинчи поғонасида бораётган амалдаги ЕЧЛ чемпиони Реал Мадрид жамоасини қабул қилади. Ўзаро 20 маротаба тўқнаш келган икки гранд жамоа ўртасидаги сўнгги ўйин Кардиффда ўтган ва ЕЧЛ финали 4:1 ҳисобида мадридликлар фойдасига ҳал бўлганди.
Жамоалар қарама-қаршилигида ҳар икки томонда 9 тадан ғалаба-мағлубият бор ва икки дуранг қайд этилган. Италияда кечадиган чорак финал ўйинига Зинедин Зидан шогирдлари Пари Сен-Жермен клубини мағлуб этиб чиққан бўлсалар, Массимилиано Аллегри жамоаси «Лос-Бланкос"нинг гуруҳдошлари Тоттенҳемдан устун келишган.
Туринликлар мезбон бўлган ўйинларда мадридликлардан фақатгина бир бора — олис ўтмишда (1962-йил) 0−1 ҳисобида мағлуб бўлишган. Яна бир эътиборга молик жиҳат шуки, «Кекса синьора» 5 йилдан буён еврокубокларда ўз майдонида мағлуб бўлмай келмоқда. Бу анъананинг бузилиши ёки ўзгармай қолиши ҳар икки жамоа таркибидаги эски танишлар — мураббий, футболчиларнинг ҳолати, танлаган тактик режаларига боғлиқ.
Ювентус бош мураббийи Массимилиано Аллегри Кардиффдаги финал ўйинини қайта-қайта томоша қилгани, ундан керакли хулосалар чиқаргани ва итальян жамоасининг мухлисларига ғалабали онлар тортиқ қила олишини УЭФА сайтига берган интервьюсида таъкидлаб ўтган. У бугунги ўйинда Маркизио ва Бентанкур тандемининг ярим ҳимояда, Ругани ва Барзалйининг ҳимояда, Пауло Дибаланинг ҳужумда кўрсатадиган ажойиб перформансидан умидвор.
Мадридисталар эса Реал Мадрид таркибида доимгидек Криштиану Роналдунинг ҳужумкор ўйини (Роналду сўнгги 5 ўйинда Буффон дарвозасига 7 марта йўл топган, бироқ жароҳати бор Криштиану Роналдунинг майдонга тушиши баъзи манбаларга кўра сўроқ остида), жамоанинг тезкор қарши ҳужуми ва ҳимоя, ярим ҳимоя чизиғидаги ишончли ва барқарор ўйин билан жамоанинг Туриндан ғалаба билан қайтишини кутмоқдалар.
Букмекерларга кўра, кичик устунлик Мадрид томонида, бироқ шу ўринда машҳур футбол иқтибоси ёдга келади: «Майдон текис, тўп эса юмалоқ».
«Севилья» (Севилья, Испания) — «Бавария» (Мюнхен, Германия) | Рамон Санчес Писхуан стадиони, Севилья | 23:45 — FutbolTV каналида
Фото: highlightsreplay.com.
Севилья ва Бавария клубларининг Европа Чемпионлар Лигаси кубоги томон йўли ўзаро илк маротаба кесишаяпти. Юпп Ҳайнкеснинг енгил сўқмоқдан сайр қилиб келган Баварияси чорак финал олдидан Бешиктош дарвозасига иккита ўйинда 8та, Бундеслигадаги асосий рақиби Дортмунднинг Боруссия клуби дарвозасига эса 6та голни жойлаб қўйган. Немис клуби футболчиларининг кайфияти ҳам, жисмоний ҳолати ҳам бирмунча яхши. Левандовскийси, унинг ортида эса бир неча йиллардан буён бир-бирини бир ҳаракатидан тушуниб келаётган кучли плеймейкер ва ҳимоячилари бор «Голливуд» ФК осонликча Севильяни таслим қилиши мумкин. Агарда…
Италиялик мураббий мюнхенликларнинг сўнгги ўйинларини, кўпни кўрган Ҳайнкеснинг услубини изчил ўрганиб чиққан, шогирдларига керакли тавсияларни бермаган бўлса. Винченцо Монтелла қўли остидаги қизил-оқлар Ла-Лигадаги Барселона билан дуранг қайд этилган баҳсда анча тер тўкишди. Блаугранларни мағлуб этишига бир баҳя қолган Севилья жамоаси шу ўйиндан ўзларига бўлган ишончни ошириб олишди. Йиллар давомида Европа Лигасида юрган Севилья гранд клублар қаторидан барқарор жой олиш ва энг асосийси, жамоавий руҳни кўрсатган ҳолда финалга қадар боришни ният қилгани аниқ. Монтелла дортмундликлар кўрсатган очиқ ўйинни такрорламаслик кераклигини жуда яхши билади.
Афсонавий итальянча ҳимоя тактикаси немис ҳужумига дош бера оладими? Николас Пареханинг ўз жамоадошларини ғалаба томон бошлаб бориш, руҳлантиришга матонати дош берадими? Букмекерларнинг тахминларига кўра яққол устунлик Мюнхеннинг Бавариясида.
Мюнхенликлар Швабинг-Фрайманн туманидаги майдонга ғалаба ҳам майли, бир гол фарқи билан мағлуб бўлиб қайтишган тақдирида ҳам севильяликларни олдинда Алянс-Аренадаги немисча пивохўрлик кутиб тургани амри маҳол.
