1 апрелдан Ўзбекистон уяли алоқа компаниялари янги частоталар режасида ишлашни бошлади. Beeline радиочастотали каналларининг бир қисмини Ucell, UMS ва Uzmobile компанияларига берганини расмий равишда эълон қилди, дея хабар берди Beeline матбуот хизмати «Газета.uz"га.
Ўтган йилнинг май ойида Радиочастоталар бўйича республика кенгашининг қарорига биноан йирик алоқа оператори Beeline 2017 йил 1 октябрига қадар овозли радио частоталарининг деярли ярмини спектрни қайта тақсимлаш учун рақобатчилар фойдасига бериш таклиф қилинган эди. Бир неча раундли музокаралардан сўнг, радиочастоталар бўйича республика кенгаши 2017 йил 11 сентябрида янги радиочастота режасига ўтиш даврини 2018 йил 1 апрелига қадар узайтириш тўғрисидаги қарорни қабул қилди, шунингдек бозорнинг барча иштирокчиларига бир вақтнинг ўзида технологик бетарафлик тақдим этилди.
Мазкур ҳужжатга биноан эндиликда уяли алоқа операторлари 900 ва 1800 МГц частоталарида нафақат «овозли» 2G стандартини, балки 3G ва 4G технологияларини ривожлантириш ҳуқуқига эга. Оддий қилиб айтганда, мобил алоқа операторлари мамлакатнинг энг чекка аҳоли пунктларини тезкор Интернет билан таъминлаш имконини беради.
Бундан аввал режалаштирилганидек, март ойининг сўнгги кунида соҳа етакчиси 900 ва 1800 МГц частоталаридаги радиочастотасининг 47 фоизидан фойдаланишдан воз кечди. Яқин кунларда бошқа мобил алоқа операторлари ҳам Beeline`нинг бўш каналлари ёрдамида янги радиочастота режасига ўтиши керак.
«Вазирлик ва Радиочастоталар бўйича республика кенгаши билан эришилган муддатлар бўйича ўзаро келишувлар туфайли биз ушбу тадбирни деярли 10 миллион абонентлар учун сезиларсиз равишда амалга ошира олдик. 900/1800 МГц диапазонида технологик нейтралитетнинг (бетарафлик) тақдим этилиши эса — телекоммуникацияларнинг ривожланишидаги ҳақиқий ютуқдир», — деди Beeline бош директори Дмитрий Шуков.
