Самарқандга яқин вақтларда икки қаватли экскурсион даблдекерлар ҳаракатланишни бошлайди. Samarkand city tour ёзуви, Ўзбекистон туристик логотипи ва маҳаллий диққатга сазовор жойлар тасвирлари туширилган қизил даблдекерлар шаҳар бўйлаб синов қатновини амалга оширди.
Самарқанд ўйлаб экскурсия сафарларини уюштиришга мўлжалланган икки қаватли автобуслар қатновини йўлга қўйиш президентнинг 7 февралдаги ички туризмни ривожлантиришни тезлаштириш тўғрисидаги қарорида кўзда тутилган эди.
Иккита автобус 2015 йилда пойтахтда даблдекерлар қатновини йўлга қўйган Aznur Travel компанияси томонидан етказиб берилди.
Компаниядан «Газета.uz"га хабар қилинишича, айни пайтда тарихий шаҳарнинг асосий диққатга сазовор масканларини қамраб олувчи ҳаракатланиш йўналишининг тасдиқланиши кутилмоқда.
Йўловчилар учун йўналишдан ўрин олган объект ва Самарқанд тарихи ҳақида маълумот берувчи саккиз тилдаги аудиотур ишлаб чиқилмоқда.
Тошкентда бўлгани каби бу ерда ҳам автобус чиптаси бир кун муддатга берилиб, йўловчилар бирор объект бекатида тушиб қолиб, уни истаганча айланиши ва кейинги рейсда саёҳатини давом эттириши мумкин.
