Ўзбекистон Миллий хавфсизлик хизмати Бош прокуратура ҳузуридаги Солиқ ва валюта жиноятларига ва жиноий даромадларни легаллаштиришга қарши кураш департаменти билан ҳамкорликда тақиқланган медикаментоз препаратлари савдосига ихтисослашгани тахмин қилинаётган гуруҳ фаолиятига чек қўйилди, дея хабар қилди «Ўзбекистон 24» телеканалининг «Ахборот 24» дастури.

19 мингта трамадол таблеткасини (кучли қарамликни келтириб чиқарувчи психотроп опиоид анальгетик -таҳр.) сотишга уриниш вақтида икки нафар Қозоғистон фуқароси ва Ўзбекистон фуқароси қўлга олинди.
Қўлга олинганлардан бирининг маълум қилишича, препаратлар Ўзбекистон ҳудудига доимий маҳсулот етказиб берувчи шахс — Қозоғистон фуқароси томонидан контрабанда йўли билан олиб кирилган. Ўзбекистон фуқароси препаратларни улгуржи сотиб олиб, чакана сотиш ва шахсан истеъмол қилишни мақсад қилган.

Айни пайтда ушбу иш бўйича терговгача текширув ишлари олиб борилмоқда.
Республика Наркология маркази маълумотларига кўра, 2015 йилда 104 нафар, 2016 йилда эса 130 нафардан ортиқ аввал героинга қарамликдан азият чекиб сўнгра трамадол истеъмолига ўтган бемор даволаниб чиқди.