Январь охирида «Газета.uz» танасидан 15 пўлат игна топилган 11 ойлик Азизбек Абдумажидов ҳақидаги хабарни эълон қилган эди. 14 март куни болакайнинг уйига — Фарғона вилояти Тошлоқ туманига кетишига рухсат берилди. Бу ҳақда Ўзбекистон Соғлиқни сақлаш вазирлиги матбуот хизмати «Газета.uz"га хабар берди.

Эслатиб ўтамиз, Азизбекнинг онаси бола саломатлиги ёмонлашганидан сўнг шифокорларга мурожаат қилади. Дастлаб томоқ шишгани сабабли яллиғланиш ташҳиси қўйилади. Бироқ боланинг саломатлиги яхшиланмагач, рентген ўтказилиб, танада игналар борлиги аниқланади.

Гўдак ва унинг онаси зудлик билан Тошкентдаги Республика шошилинч тиббий ёрдам илмий марказига жўнатилади. 17 январь куни у операция қилинади. Тўққиз соатлик жарроҳлик амалиётида 10 нафар шифокор иштирок этиб, бола танасидан 12 та игна чиқариб олинади.

Игналар гўдак танасининг турли қисмларида жойлашган, дейди марказнинг болалар жарроҳлиги бўлими шифокори Дониёр Асадуллаев. Улар йўғон ичак, қовуқ, кўкрак қафаси, умуртқа, юрак остида аниқланган.

«Бу икки ой болага тинчлик бермади. Бу тиббиётда жуда кам учрайдиган ноёб ва нозик операция. Жарроҳлик амалиётидан сўнг бола бир неча кун комада ётди. Шифокорлар унинг ҳаётини сақлаб қолиш учун барча имкониятларни ишга солишди», — деди у.

Операцияда иштирок этган профессор Ҳабибулло Оқилов Азизбек ва унинг онаси билан. Соғлиқни сақлаш вазирлиги матбуот хизмати фотоси.

Ҳозирда бола танасида яна учта игна қолмоқда, бироқ улар гўдак ҳаётига таҳдид солаётгани йўқ. Агарда улар уни безовта қилишни бошласа, шифокорлар операция йўли билан олиб ташлашади. Азизбек уйга қайтганидан сўнг шифокорлар назорати остида бўлади.

Ҳозирга қадар игналар қандай қилиб бола танасига кириб қолгани ҳақида маълумотлар йўқ. Шифокорлар бола ҳеч қачон бунчалик кўп игнани ютиб юбора олмайди, дея қайд этишмоқда, айни пайтда организмда ҳеч қандай жароҳат излари йўқ.

«Азизбек — оиламизнинг ягона фарзанди, уни никоҳимиздан сўнг беш йил кутганмиз, — дейди боланинг онаси Шоҳсанам Болтабоева. — Ҳаммага раҳмат, энди у соғлом, ва уни ўз бағримга олишим мумкин. Бунинг учун шифокорларга раҳмат. Икки ой улар ўғлим учун куч ва билимларини аяшмади. Уларнинг матонатини ҳеч қачон унутмайман!»