Ўзбекистон ҳукуматининг 21 февралдаги қарори билан Тожикистон билан давлат чегарасидаги қатор ўтказиш пунктлари фаолиятини қайта тиклаш тасдиқланди. Бу ҳақда Адлия вазирлигидан «Газета.uz"га хабар қилинди.
Ҳужжат билан Ўзбекистон Самарқанд вилоятидаги «Жартепа», Жиззах вилоятидаги «Кушкент», «Учтурган», Сирдарё вилоятидаги «Ховостобод», Тошкент вилоятидаги «Бекобод», Наманган вилоятидаги «Поп», Фарғона вилоятидаги «Равот», Сурхондарё вилоятидаги «Гулбаҳор» автомобиль йўллари ўтказиш пунктлари ҳамда «Амузанг» темир йўл ўтказиш пунктининг муҳандислик-коммуникация ва йўлбўйи инфратузилмасини янада ривожлантириш назарда тутилмоқда. Шунингдек, Самарқанд вилояти Ургут туманидаги Жартепа аҳоли пункти ҳудудидаги чегара пости ташкил этилади.
Бундан ташқари, ўтказиш пунктларига туташ автомобиль йўллари бўйида замонавий стандартларга мос йўлбўйи инфратузилмасини ташкил этиш тадбирларини ўтказиш, шунингдек, фуқаролар учун зарур ижтимоий-маиший шароитлар яратиш белгиланмоқда.
Қарор билан 2019−2020 йилларда чегара пости учун инфратузилмаларни қуриш режалаштирилган.
«Ўзбекистон темир йўллари» компаниясига 1 мартгача Ўзбекистон ҳудуди доирасида Ғалаба — Хошадий темир йўл участкаси реконструкция қилинишини таъминлаш ва ўтказиш пунктида зарур хизмат-маиший шароитлар яратиш вазифаси топширилди.
