Никоҳни рўйхатга олиш ва уни бекор қилиш қоидаларига ўзгартириш киритилмоқда. Бу Аёлларни қўллаб-қувватлаш ва оила институтини мустаҳкамлаш бўйича комплекс чора-тадбирлар дастурида ўз аксини топган, дея хабар бермоқда Norma.uz. Дастурнинг қабул қилиниши Президентнинг 2 февралдаги «Хотин-қизларни қўллаб-қувватлаш ва оила институтини мустаҳкамлаш соҳасидаги фаолиятни тубдан такомиллаштириш чора-тадбирлари тўғрисида"ги фармонида белгиланган.
Эндиликда никоҳ қуришга киришаётган шахслар хорижий тажриба инобатга олинган ҳолда ишлаб чиқилган ўқитиш дастури бўйича оилавий ҳаёт асосларини мажбурий равишда ўрганишлари лозим. Ҳозирда ФҲДЁ органларига ариза топширишда фақатгина бўлғуси эр-хотин ва ота-оналарда пайдо бўладиган ҳуқуқ ва мажбуриятлар, никоҳ тартиблари ва уни тузиш шартлари ҳақида тушунтиришлар берилмоқда.
Никоҳни рўйхатга олиш муддати узайтирилади, бироқ аниқ муддат ҳозирча маълум қилингани йўқ. Бугунги кунда ФҲДЁ органи ариза қабул қилинган кундан бир ой муддатда никоҳни рўйхатга олади.
Никоҳ қураётган шахсларни тиббий кўрикдан ўтказиш бўйича маълумотнома тақдим этувчи тиббиёт муассасалари раҳбарлари ва ходимларининг масъулиятини ошириш ҳам кўзда тутилган.
Никоҳни бекор қилиш фақатгина суд орқали амалга оширилади. Ҳозирда умумий вояга етмаган фарзандлари бўлмаган эр-хотиннинг ўзаро келишуви асосида ФҲДЁ органи уларнинг никоҳини бекор қилиши мумкин. Шунингдек, эр-хотиннинг умумий вояга етмаган фарзандлари бўлишига қарамасдан, турмуш ўртоқлардан бирининг бедарак йўқолган деб тан олингани, муомалага лаёқатсизлиги ёки уч йилдан ошиқ муддатга озодликдан маҳрум этилгани ҳисобга олинган ҳолда ФҲДЁ органи никоҳни бекор қилиши мумкин.
Эр-хотинларнинг ярашиш муддати 1 йилгача узайтирилди. Ҳозирда суд ярашиш учун олти ой муддат белгилаб, ажрим ишини кўриб чиқишни ортга суриш ҳуқуқига эга.
Никоҳни бекор қилишда эр-хотинларнинг мол-мулкка оид жавобгарлигини жорий этиш таклиф қилинмоқда. Бу ерда гап воз кечиш учун талаб қилинадиган ҳақ ҳақида кетмоқда. Жаҳон юридик амалиётида ажрим ташаббускори бўлган томон бошқа томонга тўлов тўлайди.
Norma.uz`нинг қайд этишича, бутун 2018 йилни ўз ичига олган қонун ижодкорлиги даврида кўрсатиб ўтилган янгиликларга ўзгартишлар киритилиши мумкин.
