Тошкентдаги бешта болалар боғчасида овқатланиш давлат-хусусий шериклик асосида ташкил этилади. Бу Мактабгача таълим вазирлиги (МТВ) томонидан ўтказилган тадқиқот натижаси бўлди, дея хабар қилди вазирлик матбуот хизмати «Газета.uz"га.
Сергели туман мактабгача таълим бўлими ва Aziya best distribution корхонаси тайёр овқатни етказиб бериш бўйича тўғридан-тўғри шартномани имзолади. Тадқиқот тумандаги болалар боғчаларидан бирининг ошхонасида ўтказилди. МТВ, Тошкент Мактабгача таълим бошқармаси ва Ўзбекистон Ошпазлар уюшмаси вакиллари менюдан ўрин олган таомларни тайёрлаш технологияси ва сифатига, ташқи кўриниши ва ошпазлар озодалигига баҳо беришди.
Тадқиқот натижалари бўйича корхона санитар-гигиеник нормалар, маҳсулотлар сифати ва хавфсизлигига тўлиқ риоя этиши қайд этилди. Шундай қилиб, корхона бешта болалар боғчасини тайёр таомлар билан таъминлаш ҳуқуқини қўлга киритди.
