Ўзбекистон терма жамоаси финалда Вьетнам жамоасини экстра таймларда мағлубиятга учратган ҳолда 23 ёшгача футболчилар ўртасида Осиё чемпионига айланди. Хитойда бўлиб ўтган учрашув 2:1 ҳисобида якунланди.

Учрашувдан аввал майдон қор билан қоплангани оқ либосларда ўйнаган Ўзбекистон футболчиларига қийинчилик туғдирди. Шунга қарамасдан биринчи бўлиб Ўзбекистон жамоаси ҳисобни очди. Ҳимоячи Рустам Ашурматов бурчак тўпини боши билан дарвозага йўллаб, «оқ бўрилар"ни 8-дақиқадаёқ олдинга олиб чиқди.

Биринчи тайм якунланишига оз қолганда рақиблар ҳисобни тенглаштирди — Нгуен Куанг Хай Ботирали Эргашев дарвозасининг узоқ бурчагини аниқ мўлжалга олди.

Танаффусдан сўнг Ўзбекистон кўк рангдаги либосда майдонга тушди. Ўйиннинг иккинчи ярмида ўзбекистонликлар тўпга кўпроқ эгалик қилишди (70 фоиз) ва қулай вазиятларни юзага келтириши (16 та зарба), бироқ икки тайм якунлари бўйича ҳисоб дуранг бўлиб қолди.

Ғолиб ўйининг энг охирида маълум бўлди, 120-дақиқада Андрей Сидоров бурчакдан йўлланган зарбани Вьетнам дарвозасига аниқ йўллашнинг уддасидан чиқди. Эътиборлиси, гол муаллифи ўйинга учрашувнинг 118-дақиқасида тушди.