2018 йилнинг биринчи чорагида GM Uzbekistan ишлаб чиқариш қувватларида Chevrolet Orlando автомобилларини йиғиш тўхтатилади, дея хабар қилди компаниянинг жамоатчилик билан алоқалар хизмати. Қарор General Motors томонидан моделлар сафини янгилаш бўйича глобал стратегиясига мувофиқ қабул қилинди.

Ишлаб чиқариш тугатилиши муносабати билан мазкур моделдаги автомобилларни етказиб бериш бўйича шартномаларни олишга аризаларни рўйхатга олиш тўхтатилди. GM Uzbekistan шу вақтга қадар тузилган шартномалар бўйича автомобиллар ўз эгаларига белгиланган муддатларга етказиб берилишини маълум қилди.

GM Uzbekistan етти ўринли Chevrolet Orlando минивэнини 2014 йилдан буён ишлаб чиқармоқда. Машина корхонанинг Хоразм вилоятидаги заводида йиғилган.