2018 йилда Ўзбекистон Миллий хавфсизлик концепциясининг янги таҳрири тайёрланади, дея хабар қилди сешанба куни бўлиб ўтган брифингда Олий Мажлис Сенатини раисининг ўринбосари Содиқ Сафоев.

Унинг сўзларига кўра, концепцияда мамлакатдаги вазиятни беқарорлаштиришга қаратилган ташқи ва ички таҳдидларга жавоб бериш бўйича янгича ёндашувлар акс эттирилади. Амалдаги «Ўзбекистон Республикаси Миллий хавфсизлик концепцияси тўғрисид""ги қонун 1997 йилда қабул қилинган. Қонуннинг янги таҳририни ишлаб чиқиш 2018 йилги Давлат дастури лойиҳасидан (PDF) ўрин олган.

Янги таҳрири январь аввалида қабул қилинган Мудофаа доктринаси каби Миллий хавфсизлик концепцияси ҳам миллий хавфсизликка таҳдидлар ва халқаро вазиятнинг ўзгаришларига адекват жавоб қайтариши лозим, деди Содиқ Сафоев.

Айни пайтда хавфсизликка таҳдидларга қарши курашни анъанавий шакллар билан чеклаб бўлмайди, деб ҳисоблайди сенатор. «2017 йилда туб илдизлари, манбалари билан курашиш кераклигини тушунишда муайян ўзгаришлар содир бўлди», — дея қўшимча қилди у.

Таҳлиллар Ўзбекистонда замонавий қурол-яроғлар билан таъминлаш соҳасида кўплаб камчиликлар борлигини кўрсатди, деди Содиқ Сафоев. Мазкур масалаларни ечиш учун мудофаа саноати бўйича Давлат қўмитаси ташкил этилди. Хавфсизликни таъминлаш ва ҳарбий қурилишнинг бошқа йўналишлари ҳам тубдан қайта кўриб чиқилади, деди Сенат раисининг биринчи ўринбосари.