Тошкент ва Тошкент вилоятига бошқа давлатлардан келиб яшаш учун рухсатнома олган, бироқ республиканинг бошқа ҳудудларида пропискадан ўтмаган жисмоний шахслар — чет эл фуқаролари ва фуқаролиги бўлмаган шахслар пойтахт ва пойтахт вилояти ҳудудида 600 млн сўмдан арзон бўлмаган янги қурилган турар жойлардан кўчмас мулк харид қилишлари мумкин. Бу ҳақда Norma.uz хабар бермоқда.
Авваллари бундай шартномалар учун энг кам нарх 150 минг АҚШ доллари ёки 1,221 млрд сўмдан ортиқ бўлиши керак эди. Адлия вазирининг 15 январдаги буйруғи билан Нотариусларнинг нотариал ҳаракатларни амалга ошириш тартибларига ўзгартиш ва қўшимчалар киритилди.
Юқоридаги шартлар асосида турар жой сотиб олган шахс Тошкент ва Тошкент вилоятида доимий прописка олиш ҳуқуқига эга бўлади.
Параллел равишда бундай шартномаларни нотариал тасдиқлаганлик учун давлат божининг энг кам миқдори ҳам шартнома суммасининг 10 фоизигача камайтирилди.
Янги қурилган иншоотлар деганда фойдаланишга топширилганига уч йилдан ошмаган иншоот ёки турар жой биноси назарда тутилади.
