«Ўзбекистон ҳаво йўллари» Миллий авиакомпанияси 30 декабрдан 3 январгача бўлган муддатда маҳаллий йўналишлар бўйича чипталарга чегирмалар жорий этилганини эълон қилди. Бу ҳақда ташувчи матбуот хизмати хабар қилди.
Президент Шавкат Мирзиёевнинг яқинда эълон қилинган фармонида Янги йилда кетма-кет беш кунлик таътил белгиланган эди. Ҳужжатда байрам (ишланмайдиган) кунлари муддати узайтирилганини ҳисобга олган ҳолда транспорт ва меҳмонхона хизматларига чегирмалар ва акциялар тақдим этиш орқали республика аҳолиси учун ички туризм йўналишлари ва фаол дам олишни ташкил этиш топширилди.
Компания маълумотларига кўра, туристик гуруҳлар (беш кишидан бошлаб), мактаб ёшидаги болалар (6−15 ёш) ҳамда коллеж, лицей ва ОТМлар талабалари учун 40 фоизлик чегирма жорий этилди.
Икки ва ундан ортиқ киши бўлган оилалар ҳамда фарзандларини олиб кетаётган ота-оналар учун 50 фоизлик чегирма амалда бўлади.
