5 та клубнинг 100 нафардан зиёд футболчилари Ўзбекистон Суперлигасида (аввалги Олий лига) иштирок этиш учун дастлабки норматив синовларидан ўта олмади, дея хабар қилди Футбол федерацияси.
ЎФФ ўзбек футболи тарихида биринчи марта миллий чемпионатда иштирок этаётган клублар футболчиларини синовдан ўтказмоқда. Бу чора-тадбирлар Суперлига клубларида иштирок этадиган футболчиларнинг жисмоний ҳолатини назорат қилиш, терма жамоалар учун муносиб номзодларни етказиш мақсадида амалга оширилмоқда, дейилади хабарда.
Шу кунга қадар ЎФФ жадвалига мувофиқ «Олмалиқ», «Машъал», «Навбаҳор», «Қўқон-1912» ва «Цементчи» жамоалари спортчилари синовдан ўтди. Синовлар 30 метрга югуриш, турган жойидан узунликка сакраш, 7×50 метрга югуриш ва «Yo-Yo» тест (фишкалар орасида 20 м масофага югуриш) бўйича ўтказилди.
Нормативлар топшира олмаган футболчиларга миллий чемпионат бошлангунга қадар муҳлат берилади. Улар клуб бош мураббийи белгилаб берган дастур орқали ўз устиларида ишлашлари керак.
Суперлига бошланишидан аввал клуб футболчиларидан яна бир бор нормативлар қабул қилинади. Синовлардан ўта олмаган футболчилар чемпионатда иштирок эта олмайдилар.
«Миллий чемпионатимиз футболчиларидан нормативлар қабул қилиш Ўзбекистон Футбол Федерацияси президенти Умид Аҳмаджоновнинг талаби бўлиб, бундай нормативлар эндиликда ҳар доим футболчилардан қабул қилинади ва уларнинг жисмоний ҳолати назорат қилиб борилади, — деди Клублар футболчиларидан нормативларни қабул қилаётган педагогика фанлари номзоди, профессор Шамиль Исеев. — Бундай нормативлар бутун дунёда топширилади. Масалан, „Yo yo тест“ Европанинг кучли чемпионати футболчиларидан ҳам мавсум олдидан олинади ва уларнинг тезкорлиги, чидамлилиги синовдан ўтказиб турилади. Терма жамоамизнинг халқаро майдонлардаги муваффақиятсиз ўйинларининг асл сабабини ҳам айнан мана шундан қидириш керак».
«Масалан, Жаҳон чемпионати саралаш баҳсларида қатнашган Ўзбекистон миллий терма жамоаси футболчилари ўйинларини таҳлил қиладиган бўлсак, учрашув охирларига келиб футболчиларнинг техник-тактик ҳаракатлар пасайгани, тўпни олиб қўйиш, шерикларига ошириш, узун паслар бериш, ҳаводаги тўп учун кураш ва ҳоказоларда браклар кўпайганини кўриш мумкин», — дея давом эттирди мутахассис.
«Бизнинг футболчилар жисмоний жиҳатдан кучли бўлмаганликлари туфайли 90 дақиқа давомида фаол ҳаракат қила олишмади. Натижада, ЖЧ йўлланмаси қўлдан бой берилди. Агар миллий чемпионатимизда иштирок этадиган футболчиларнинг жисмоний ҳолати яхши бўлса, бу ҳолат терма жамоаларимиз ўйинларига ҳам ижобий таъсир кўрсатади», — деди Шамиль Исеев.
«Бундай нормативлар бундан буёғига доимий равишда футболчилардан олинади. Футболчиларнинг жисмоний ҳолати ҳамиша назоратда бўлади. Тартиб-интизом ҳамиша биринчи ўринда бўлиши керак. Қаердаки, тартиб-интизом ўрнатилмас экан, ўша ерда натижалар ҳам салбийлашиб бораверади. Ўз устида ишламайдиган, тартиб-интизомга амал қилмайдиган футболчи ва мураббийлардан натижа кутиш ҳам мантиқан нотўғри. Бир сўз билан айтганда, тартиб-интизомга риоя қилмайдиганларга орамизда ўрин йўқ», — деди Футбол федерацияси раҳбари Умид Аҳмаджонов.
