Ўзбекистондаги барча тадбиркорларнинг молиявий-хўжалик фаолиятини текшириш 2 йилга тўхтатилади. Президент Шавкат Мирзиёев жума куни Олий Мажлис Сенати ва Қонунчилик палатасига мурожаатида ушбу таклиф билан чиқди.

Президент назорат қилувчи органлар фаолиятини мувофиқлаштириш бўйича республика кенгаши фаолияти замон талабларига жавоб бермаслигини маълум қилди.

«Ўзингиз ўйланг, ушбу кенгашнинг ишчи органи ҳам, энг кўп текшириш ўтказадиган назорат органи ҳам — солиқ идорасининг ўзи. Текшириш учун ҳам ўзи рухсат берса, ҳам ўзи текширса, буни қандай тушуниш мумкин», - деди Шавкат Мирзиёев.

Шу муносабат билан текширишлар ўтказишга рухсат беришнинг махсус электрон ахборот тизимига ўтиш ва унинг назоратини Бош прокуратурага юклаш мақсадга мувофиқ, деб таъкидлади Президент.

«Жойларда мутасаддилар тадбиркорга каламушдай ёпишиб олган. Тадбиркорларни текширавериб, ишлашига йўл қўймайди. Уларни амалда етарлича қўллаб-қувватлай олмаётганимиз менинг энг катта армоним», - деди Шавкат Мирзиёев.