Ўзбекистон Футбол федерацияси Ижро қўмитаси «Нефтчи» бош мураббийи Вадим Абрамовнинг мураббийлик лицензиясини номаълум муддатга қайтариб олди, деб хабар қилди ЎФФ матбуот хизмати.

Лицензиянинг вақтинча бекор қилинишига Вадим Абрамовнинг, федерация интизом кодексига мувофиқ, ЎФФ ва Профессионал футбол лигаси, шунингдек унинг вакиллари обрўсига салбий таъсир кўрсатиб, мазкур ташкилотлар қарорларини нотўғри талқин этгани сабабли кенг жамоатчилик ўртасида «носоғлом фикрлар"нинг пайдо бўлишига олиб келадиган «нотўғри» мулоҳазалари сабаб бўлган.

Лицензияни қайтариб олиш тўғрисидаги қарор 16 декабрда қабул қилинган.

«Нефтчи» устози яқинда Championat.asia сайтига берган интервьюсида футбол ташкилотининг бир қатор қарорларини, жумладан мамлакат чемпионатининг янгича шаклини танқид остига олган эди.

«Аслида мен бир неча йиллар аввалроқ янги формат қилишни таклиф этгандим. 2008 йилда жамоалар сонини 12 тагача қисқартириш ташаббуси билан чиққан эдим. Ўшанда Олий лиганинг иккита жамоаси қуйи лигага тушиши, Биринчи лиганинг икки жамоаси эса юқорилаши керак эди. Бироқ қандайдир сабаб билан Биринчи лигадан ҳеч ким Олий лигада ўйнаш истагини билдирмади. Ўшанда натижада ҳеч ким Олий лигани тарк этмади.

«Газета.uz"нинг ЎФФдаги ахборот манбасининг ойдинлик киритишича, Вадим Абрамов ўз норозилигини ЎФФ раҳбариятига шахсан билдириши керак эди, ОАВ орқали оммавий билдириш ўрнига.

ЎФФнинг четлатиш тўғрисидаги қарорига изоҳ берар экан, Вадим Абрамов эҳтимол федерацияга келгуси йилдан футболчилар топшириши керак бўлган нормативларнинг ниҳоятда мураккаб эканлиги ҳақидаги фикрлари ёқмаган бўлиши мумкинлигини айтиб ўтди.

«Нормативни ҳаттоки Бобби Чарльтон ҳам (Англия термаси таркибида жаҳон чемпиони ва 1966 йилги „Олтин тўп“ соҳиби — таҳр.) топшира олмасди. Мен вазиятга ойдинлик киритиш учун федерацияга бораман. Агарда мени ўзбек футболи учун кераксиз одам деб ҳисоблашса, бунинг учун мени четлатишлари шартмас, айтишса ўзим кетаман», — деди мутахассис .