14−16 ноябрь кунлари Тунисда электроалоқа/АКТ (WTIS) соҳасида жаҳон кўрсаткичлари бўйича Халқаро электроалоқа кенгаши (ХЭК) Электроалоқани ривожлантириш бюросининг (ЭРБ) 15-симпозиуми бўлиб ўтди. Форумда Ўзбекистон Ахборот технологиялари ва коммуникацияларини ривожлантириш вазирлиги делегацияси ҳам иштирок этди.
Мазкур анжуманда ХЭКнинг янги «Ахборий жамият ўлчовлари» ҳисоботи эълон қилинди. Унда 190 дан зиёд давлатда АКТни ривожланганлик даражасини белгиловчи сўнгги АКТни ривожлантириш индекси (IDI) натижалари ўрин олган.
Ҳисоботга мувофиқ, Ўзбекистон 8 поғона юқорилаб, эндиликда АКТни ривожлантириш индексида 95-ўринни эгаллади. Ўтган йили Ўзбекистон 110-ўринни банд этган, бироқ мамлакат маълумотлари қайта кўриб чиқилиб, 103-ўринга ўтказилган эди.
Натижада Ўзбекистон АКТ соҳасида энг жадал ривожланаётган мамлакатлардан бири сифатида тан олинди.
АКТни ривожлантириш индекси уч суб-индексдан таркиб топган. Уларнинг ҳар бири АКТни ривожлантириш жараёнининг турли қирралари ва таркибий қисмларини ўз ичига олади.
