15 ноябрдан Ўзбекистонда автобензин ва дизель ёнилғиси нархи ўртача 1,5 баробарга ошади, дея хабар қилди «Газета.uz"га ҳукуматдаги ахборот манбаси. Пойтахтдаги бир қанча автомобилларга ёнилғи қуйиш шохобчалари ҳам ярим тундан нархларни оширишга тайёргарлик кўрилганини тасдиқлашди.
Янги нархлар Вазирлар Маҳкамасининг 14 ноябрдаги қарори билан тасдиқланди. У «Ёнилғи-энергетика ресурсларини ўз вақтида таъминлаш бўйича қўшимча чора-тадбирлар тўғрисида» деб номланган. Ҳужжатдан маълум бўлишича, худди шу куни Президентнинг «Ёнилғи-энергетика ресурслари ва бошқа юқори ликвидли маҳсулотлар билан таъминлаш соҳасида рақобат муҳитини такомиллаштириш, суиистеъмол ва талон-тарожликлар учун шарт-шароитларни бартараф этиш, тўлов интизомини мустаҳкамлаш, дебиторлик ва кредиторлик қарздорликни қисқартириш бўйича чора-тадбирлар тўғрисида"ги қарори ҳам қабул қилинган. Нархларнинг ошишига ёнилғи-энергетика ресурсларига бўлган жаҳон нархларининг кўтарилиши ҳам сабаб қилиб кўрсатилган.
Аи-80 русумли автобензиннинг янги нархи бир литри учун 3800 сўм (ўсиш — 35,7 фоиз), Аи-91 — 4300 сўм (+43,3 фоиз), дизель ёнилғиси — 4100 сўм (+72,6 фоиз) ва ЭКО дизель ёнилғиси — 4200 сўмни (+71 фоиз) ташкил этди.
Қарорда импорт қилинувчи ва импорт қилинган хом ашёни қайта ишлашдан олинган Аи-92, -93, -95 ва -98 бензин маркалари (айни пайтда АЁҚШларда мавжуд эмас) ҳамда Европа сифати ва стандартларига жавоб берувчи дизель ёнилғиси АЁҚШлар орқали эркин тижорий нархларда сотилади. Ушбу маҳсулотлар рўйхати ҳукумат томонидан белгилаб берилади.
15 ноябрдан қонунчилик асосида белгилаб берилган алоҳида шахслар тоифалари томонидан автобензин сотиб олиш учун харажатларнинг бир қисмини қоплаш бўйича ҳар ойлик пуллик бадал миқдори 63,4 минг сўм этиб белгиланди.
Қарорда 2018 йил 1 апрелдан табиий газ нархларининг 10 фоизга, электр энергияси эса 12 фоизга қимматлашиши ҳам хабар қилинган.
Аввалги нарх оширилиши бир йилдан сал зиёдроқ олдин — 2016 йил октябрь ойи охирларида амалга оширилган эди. Ўша вақтда нархлар ўртача учдан бир қисмга ошган, бу ушбу кўтарилиш «мураккаб вазиятни ўнглаш ва айрим фуқароларнинг ноқонуний хатти-ҳаракатларининг олдини олиш» билан изоҳланган эди.
Аввал бўлгани каби бу сафар ҳам нархлардаги ўзгаришлар ҳеч қаерда олдиндан маълум қилингани йўқ. Сешанба куни кечқурун ижтимоий тармоқларда ҳукумат қарори нусхасининг фотосуратлари тарқалди. Бир кун муқаддам «Ўзбекистон 24» давлат телеканалида Ўзбекистон вилоятларида бензин тақчиллиги юзага келгани ва кўчаларда олибсотарлар томонидан ёнилғи сотилаётгани ҳақидаги лавҳа эфирга узатилди.
«Ўзнефтмаҳсулот» компанияси бошқарув кенгаши раиси ўринбосари Адҳамжон Исомов 14 ноябрь куни «Дарё» интернет нашри саволларига жавоб берар экан, автомобил ёнилғисига бўлган жорий нархлар уни аҳолига етказиб бериш харажатларини қопламаслигини маълум қилган эди.
Қайд этиш жоизки, «Ўзнефтмаҳсулот» сайтида сўнгги хабарлардан бири «Жаҳонда нефть нархлари пасаймоқда» деб номланган эди.
