Тошкентнинг «Обод» футбол клуби Ўзбекистон Профессионал Футбол Лигаси Ижроия Қўмитасининг ЎФФ билан бирга келишилган қарорига кўра, футбол бўйича 2017 йилги Ўзбекистон чемпионати қатнашчилари сафидан чиқарилди.
Футбол федерацияси матбуот хизматининг хабар қилишича, қарорнинг қабул қилинишига бир неча сабаблар асос бўлган. Биринчи навбатда — «Обод"нинг ПФЛ олдидаги 120 млн сўмлик қарзи. Иккинчидан, лицензион ҳужжатларнинг йўқлиги ва молиявий ҳужжатларни тақдим этишдан бош тортиш. Мазкур ҳолат шубҳали ва тушунарсиз молиялаштириш манбалари бор, деган тахминнинг илгари сурилишига сабаб бўлмоқда.
Учинчидан, ЎФФга халқаро «Федербет» нотижорат федерацияси котибиятидан 20-тур доирасида «Обод"нинг «Сўғдиёна» (2:2) ва 22-турда Насаф (0:6) билан учрашувларининг шубҳали натижалар билан тугагани тўғрисида хат келиб тушган.
23 тур якунлари бўйича «Обод» 9 очко билан турнир жадвалининг сўнгги поғонасини эгаллаб турибди.
