Олий Мажлис Сенати 4 октябрь куни очиладиган 12-ялпи йиғилишда 5 сентябрь куни Бишкекда имзоланган Ўзбекистон Республикаси ва Қирғизистон Республикаси ўртасидаги ўзбек-қирғиз Давлат чегараси тўғрисидаги Шартномани ратификация қилиш тўғрисидаги қонунни кўриб чиқади.
Қонун 28 сентябрь куни Олий Мажлис Қонунчилик палатаси томонидан қабул қилинган эди. У Ўзбекистон Президенти имзолаганидан сўнг кучга киради.
Қирғизистон Президенти Жогорку Кенеш томонидан 28 сентябрда қабул қилинган ушбу шартномани ратификация қилиш тўғрисидаги қонунни 2 октябрда имзолади.
Шартномага кўра, томонлар 1170,53 километрлик давлат чегаралари бўйича келишувга эришган.
Парламент юқори палатаси ахборот хизматининг хабар қилишича, Сенат йиғилиши кун тартибидан айрим қонунчилик актларига фуқароларнинг кафолатланган меҳнат ҳуқуқларини таъминлаш масаласига оид ўзгартиш ва қўшимчаларни киритишни кўзда тутган қонун муҳокамаси ҳам ўрин олган.
