Ўзбекистон Футбол федерацияси миллий терма жамоа бош мураббийи лавозимига чет эллик мутахассисларни жалб қилиш масаласини кўриб чиқмоқда. Бу ҳақда федерация матбуот хизмати хабар қилди. Янги мураббийни тайинлаш спорт ташкилотининг бешта устувор масаладан бири ҳисобланади.
ЎФФнинг янги раҳбарияти келишилган ўйиларга қарши курашни кучайтиришни мақсад қилган. Федерация тузилмасида футболдаги коррупцияга қарши кураш бўйича махсус бўлим, шунингдек, келишилган ўйинларга қарши кураш бўйича бўлим ва қўмита ташкил этилиб, улар фаолиятини Футбол федерациясининг шахсан ўзи назорат қилади.
Навбатдаги вазифа болалар ва ўсмирлар футболини қинғирликлардан тозалашдан иборат бўлиб, ёшларнинг футбол мактаблари ва клубларига жойлашишида, шунингдек, машғулотлар жараёнида маҳаллийчилик ва уруғ-аймоқчиликка йўл қўйилмаслиги ва спорт принципларининг бирламчи бўлишини таъминлашга қаратилади. Бундан ташқари, футболчиларнинг ёшларини сохталаштириш каби иллатга қарши курашиш бўйича ҳам янги чора-тадбирлар белгилаб олинади.
Федерациянинг «Ҳар бир болага биттадан тўп» номли янги ривожлантириш дастури ишга туширилади.
Шунингдек, федерация ишининг шаффофлигини таъминлаш ва шу орқали фуқароларнинг федерацияга ишончини ортишига эришиш галдаги устувор вазифалардан. Аксарият мурожаатларда федерация халқнинг маблағини суиистеъмол қилганликда айбланади. Фуқароларда пайдо бўлган нотўғри тасаввурни йўқотиш учун федерация молиялаштириш учун маблағни қаердан олиб, қаерга сарфлашини шаффофлаштиришни таъминлайди.
Бундан ташқари, федерация терма жамоалар, чемпионат, кубок ва биринчилик ўйинларига электрон чипталар савдосини йўлга қўйиш орқали ишқибозлар чипталарни ўз нархида ва тенг тақсимлаш тизимини йўлга қўйишдир. Бу билан чипталар савдосига чайқовчиларнинг таъсирини камайтириш, ҳудудлардаги ишқибозларнинг ўз уйларидан туриб ўйинларга чипта сотиб олишини таъминлаш каби қулайликларни яратиш асосий мақсад қилиб олинган, дейилади хабарда.
ЎФФ Президенти Умид Аҳмаджонов ушбу ҳафтада ФИФА президенти Жанни Инфантино билан учрашади.
Кейинги ҳафтада эса ЎФФ 2018−2022 йилларда Футболни ривожлантириш дастурини тақдим этади.
