Ўзбекистон Республикаси Шаҳарсозлик кодексининг 3, 17, 21-бандларига асосан ва қурилиш соҳасидаги меъёрий базасини янада такомиллаштириш мақсадида бир қатор қурилиш меъёр ва қоидаларига ўзгартиришлар киритилди.

Ўзбекистон Давлат архитектура ва қурилиш қўмитасининг 3 июлдаги буйруғи билан ШНҚ 2.08.01−05 «Турар жой бинолари» меъёрий ҳужжатига ўзгартиришлар киритилди, дея хабар қилинди Тошкент ИИББ сайтида.

9.33-бандига киритилган ўзгаришга кўра, ҳар бир хонадонда қаттиқ ёнилғида ишлайдиган иситиш қозонини қўллаш 2-қаватгача, газда ишлайдиганларига эса 9-қаватгача (авваллари 5-қаватгача эди) рухсат этилди.

Янгиланган 9.9-бандига мувофиқ, ётоқхоналарга нафақат электр плиталар, балки қаттиқ ёнилғида иситувчи плиталар (икки қаватгача бўлган бинолар шу жумладан), шунингдек газли (10-қаватгача шу жумладан) ўрнатишга ижозат берилди.