6 сентябрдан ўзбек-қирғиз чегарасидаги «Дўстлик» / «Достук» назорат-ўтказиш пункти фаолияти куну тун режимида ўз фаолиятини қайтадан тиклади, дея хабар қилди. Қирғизистон ҳукумати сайти. Ушбу пункт орқали чегарани соддалаштирилган тартибда кесиб ўтиш мумкин.
Очилиш маросимида иштирок этган Қирғизистон бош вазири ўринбосари Дуйшенбек Зилалиев пунктнинг очилишини икки мамлакат ўртасидаги ҳамкорликни ривожлантириш учун кучли рағбат бўлиб хизмат қилишини таъкидлади.
Фото: kabar.kg.
2010 йилдан буён Ўзбекистоннинг Андижон вилояти ва Қирғизистоннинг Ўш вилояти ўртасидаги пункт куннинг чекланган қисмида фаолият кўрсатиб келаётган эди. Чегараларни кесиб ўтиш учун таклифнома ёки телефонограмма сингари қатор ҳужжатлар талаб қилинар эди. Эндиликда икки республика фуқаролари чегараларни ҳеч қандай қўшимча ҳужжатларсиз соддалаштирилган тартибда кесиб ўтишлари мумкин.
Чегараларни очиш тўғрисидаги қарор 5−6 сентябрь кунлари Ўзбекистон Президенти ШАвкат Мирзиёевнинг Бишкекка давлат ташрифи доирасида қабул қилинган эди.
Маросимда Андижон вилояти ҳокими Шуҳратбек Абдураҳмонов, Ўш мэри Айтмамат Кадирбаев ҳамда икки давлатнинг бошқа расмий мутасаддилари иштирок этди. Ҳодисани нишонлаш учун ҳар икки томондан кўп сонли фуқаролар ҳам ташриф буюрди.
