АҚШ Президенти Дональд Трамп Ўзбекистон Президенти Шавкат Мирзиёевга Мустақиллик куни муносабати билан табрик мактубини йўллади. Бу ҳақда «Ўзбекистан 24» телеканалининг «Ахборот 24» дастури хабар қилди.
«Сизни ва Ўзбекистон халқини 1 сентябрь куни нишонланадиган мамлакатингиз мустақиллигининг 26 йиллиги билан Америка халқи номидан муборакбод этаман. Ўзбекистон миллий байрами ҳамда Сизнинг давлат раҳбари лавозимидаги фаолиятингизнинг биринчи йили якунланаётгани муносабати билан мамлакатларимиз ўртасидаги ҳамкорлик ва шерикликни янада мустаҳкамлаш йўлида қатъий эканимизни тасдиқламоқчиман», — дейилади табрикда.
«Биз Сизнинг раҳнамолигингизда амалга оширилаётган минтақада барқарорликни таъминлаш, демократик қадриятларни мустаҳкамлаш ва ўзаро манфаатли иқтисодий имкониятларни кенгайтиришга қаратилган изчил саъй-ҳаракатларни қўллаб-қувватлаймиз», — дея таъкидланади мактубда.
Дональд Трамп Шавкат Мирзиёев ва бутун Ўзбекистон халқига ушбу қутлуғ санани шоду хуррамлик билан нишонлашни тилади.
