Ўзбекистонда бошқа давлатларда фойдаланиб келинаётган хорижлик сайёҳлар учун махсус Uzbekistan Pass жорий этилади. Бу Президентнинг 16 августдаги «2018−2019 йилларда туризм соҳасини ривожлантириш бўйича биринчи навбатдаги чора-тадбирлар тўғрисида"ги қарорида кўзда тутилган.
Ҳужжатда бутун республика бўйлаб фойдаланиш мумкин бўлган, товар ва хизматларни чегирмалар билан харид қилиш имконини берувчи махсус пластик карталарни ишлаб чиқиш таклиф этилмоқда.
Uzbekistan Pass карталарини аэропортлар, меҳмонхоналар ва бошқа жойлардан сотиб олиш мумкин бўлади. Uzbekistan Pass карталари Ўзбекистонга кириш учун виза олишда бепул тақдим этилиши ҳам мумкин.
Uzbekistan Pass сайёҳлик операторлари хизматлари пакетига ҳам киритилиши режалаштирилган. Мазкур картага эга бўлган чет элликлар маданият объектларига киришда чегирмаларга эга бўлади.
Ушбу кенгайтирилган дастур кўплаб мамлакатларда сайёҳларга туристик объектлар, истироҳат боғлари, музейлар, кўргазмаларга ташриф буюришда, жамоат транспортидан фойдаланиш, шопинг, интернетга уланиш ва бошқаларда махсус таклиф ва чегирмаларни тақдим этиб, муваффақиятли жорий этиб келинмоқда.
«Пасс"лар турли муддат (кун, ҳафта, ой), қамров (шаҳар, ҳудуд, бутун мамлакат) бўйича амалга жорий этилиб, ҳар хил турлар ва хизматлар пакетини ўз ичига олиши мумкин. Айрим мамлакатларда «пасс"лар фақатгина электрон кўринишда бўлиб, мамлакатга киришда интернет орқали харид қилинади ва сўнгра уни чоп этиш ёки смартфонга юклаб олиш мумкин. Айрим ҳолларда «пасс"лар нархи виза қийматига киритилади.
