Энг сўнгги автобус бекатларининг тугатилиши сўнгги йилларда Тошкент метрополитенида йўловчилар оқимига салбий таъсир кўрсатди. Бу ҳақда «Ўзбекистон темир йўллари» бошқаруви раиси ўринбосари, «Тошкент метрополитени» бошлиғи Ойбек Худойқулов чоршанба куни бўлиб ўтган Халқаро пресс-клубда маълум қилди.
«2010-йилларда метронинг „Олмазор“ (собиқ „Собир Раҳимов“ — таҳр.), „Дўстлик“ („Чкалов“), „Беруний“ бекатлари автобус станцияларидан тўлар эди. Бироқ энг сўнгги автостанцияларнинг тугатилиши ташиш ҳажмининг камайишига олиб келди. 2014—2015 йилларда биз унча яхши бўлмаган даврни бошдан кечирдик. 2014 йилни 14 млрд сўмлик, 2015 йилни эса 10 млрд сўмлик зарар билан якунладик», — деди у.
Айни пайтда Тошкентда йўловчиларни метрополитенга жалб этиш учун автобус йўналишлари қайта кўриб чиқилмоқда, дея қайд этди Ойбек Худойқулов. Метрополитен ташиш рентабеллигини ошириш учун йўналишни такрорловчи ер усти транспорти йўналишлари олиб ташланади, метро станцияларига олиб борувчи автобуслар йўналишлари давомийлиги ва схемалари қайта кўриб чиқилмоқда.
Метрополитен 2027 йилга қадар бир қатор солиқларни тўлашдан озод қилинди. «Бу биз оёққа туриб олишимиз учун амалга оширилди», — деди метрополитен раҳбари.
Ҳисоб-китобларга кўра, Юнусобод йўналишида янги бекатлар ҳамда Сергели тармоғи ишга тушганидан сўнг йўловчилар оқими 50 фоизга — кунига 200 мингдан 300 мингга ошади.
Тошкент метрополитенини 2030 йилгача ривожлантириш режасига мувофиқ, 10 та янги метро станцияси қурилиши режалаштирилмоқда, деди Ойбек Худойқулов. 22 километрлик ер ости, 102 километрлик ер усти линияларини ётқизиш, умумий масофани 160 километрга етказиш режалаштирилган. Бугунги кунда пойтахт метроси 29 та станциядан иборат бўлиб, умумий узунлиги 36,2 километрни ташкил этади.
Ҳозирда хитой мутахассислари билан ҳамкорликда Ўзбекистон йўналишининг иккита станцияси («Беруний"дан Қорақамиш томонга), Чилонзор йўналишининг учта станцияси («Буюк ипак йўли"дан ТТЗ мавзесигача) ва Юнусобод йўналишининг бешта станцияси («Минг ўрик"дан Жанубий вокзалгача) лойиҳалари устида иш олиб борилмоқда.
