14−23 июль кунлари Лондонда бўлиб ўтган енгил атлетика бўйича паралимпия жаҳон чемпионатида Ўзбекистон терма жамоаси еттита медални қўлга киритди ва Жаҳон ва Осиё рекордларини янгилади, деб хабар қилди «Газета.uz"га Миллий паралимпия ассоциацияси.
Мусобақанинг сўнгги кунида ўзбекистонлик спортчилар жамоага иккита кумуш медал тақдим этди. Аёллар ўртасида ядро улоқтириш спорт туридан София Бурхонова 14.76 м натижа билан «кумуш» соҳибасига айланди. Биринчи ўринни италиялик Ассунта Леньянте (15,82 м), учинчи ўринни эса Мексикадан Ребека Альварес (13,05 м) эгаллади. Аввалроқ София Бурхонова диск отишда (38,17 м) кумуш медални қўлга киритган.
Эркаклар ўртасида ядро улоқтириш бўйича Ҳусниддин Норбеков 14,87 м натижа билан жаҳон вице-чемпионига айланди. Энг яхши натижани литвалик Миндаугас Билюс (16,26 м) кўрсатган бўлса, яна бир Литва вакили Донатас Дундзис (13,13 м) бронза медалини қўлга киритди.
10 кун давом этган «Лондон-2017» Жаҳон Чемпионатида Ўзбекистон учта олтин ва тўртта кумуш медални қўлга киритиб, 66 та жамоа ўртасида 19-ўринни эгаллади. Найза отиш бўйича Александр Свечников янги жаҳон рекордини ўрнатган бўлса, узунликка сакраш бўйича Дониёр Солиев Осиёдаги энг яхши натижани янгилади.
Мусобақа доирасида 1050 нафар паралимпиячи 213 тўплам медал учун курашди.
