«Ўзбекэнерго» компанияси ва Корея электроэнергетика корпорацияси (KEPCO) 22 июль куни ўзаро тушуниш тўғрисидаги меморандумни имзолади, деб хабар қилди «Ўзбекистон» телеканалининг «Ахборот» дастури.
«Меморандумда энергетика соҳасининг барча йўналишлари, электр энергиясини ишлаб чиқаришдан тортиб, уни охирги истеъмолчига етказишгача бўлган барча жараёнлар бўйича ҳамкорлик қилиш кўзда тутилган», — деди «Ўзбекэнерго» ташқи иқтисодий алоқалар ва инвестицияларни жалб этиш бошқармаси бошлиғи Шоюсуф Усмонов.
Эскирган электростанцияларни модернизация қилиш бўйича лойиҳаларни амалга ошириш режалаштирилган. Ўзбекистон мутахассислари корейс ҳамкасблари билан тажриба алмашиб, янги технологияларни ўзлаштиришлари мумкин.
KEPCO президенти Чо Хван Икнинг таъкидлашича, Ўзбекистон мутахассислари KEPCO технологиялари ва қувватлари танишиш учун Корея Республикасига юборилиши мумкин.
