Ўзбекистонда хорижга чиқиш паспортларини жорий этишга қарор қилинди. Бу ҳақда Президентнинг 11 июлдаги миграцион жараёнлар ва фуқароликни расмийлаштиришда ички ишлар органларининг фаолиятини тубдан такомиллаштириш тўғрисидаги қарорида сўз боради.
Ҳужжатда ваколатли ташкилотларга бир ой муддатда мазкур масала бўйича таклифларни ишлаб чиқишга кўрсатма берилди.
Таклифларда хорижга чиқиш паспортларини жорий этишнинг аниқ босқичлари, муддатлари, техник шартлари ва молиявий харажатлар акс этиши лозим.
Ички ва ташқи паспортларни жорий этиш, чет элга чиқишга рухсат беришни расмийлаштириш (стикер) жараёнини бекор қилиш 2017−2021 йилларда Ўзбекистонни ривожлантириш бўйича Ҳаракатлар стратегиясида кўзда тутилган эди.
Қайд этиш жоизки, 2011 йилдан жорий этилган биометрик паспортлар амалда хорижга чиқиш паспорти ҳисобланиб, халқаро талабларга жавоб беради.
