Ўзбекистон вакиллари 15−23 июнда Токиода бўлиб ўтган оғир атлетика бўйича ўсмирлар жаҳон чемпионатида чемпион ва вице-чемпионликка сазовор бўлди, деб хабар қилди Миллий олимпия қўмитаси матбуот хизмати.

Фарҳодбек Собиров 94 кг гача вазн тоифасида умумий 390 кг — даст кўтаришда 180 кг («олтин») ва силтаб кўтаришда 210 кг га («олтин») натижага эришди. Беларус Яугени Циханцоу умумий 378 кг (даст кўтаришда — 171 кг, силтаб кўтаришда — 207 кг) кўрсаткич билан иккинчи ўринни эгаллади. Бронза медали соҳиби эронлик Рахман Оурамех — 364 кг (даст кўтаришда — 159 кг, силтаб кўтаришда — 205 кг) натижани кўрсатди.

Фарҳодбек Собиров чиқишининг видео лавҳалари

77 кг гача вазн тоифасида Шаҳзод Худайбергенов иккикурашда умумий 338 кг — 152 кг даст кўтаришда («бронза») ва 186 кг силтаб кўтаришда («кумуш») натижа кўрсатиб, кумуш медалига сазовор бўлди. Ғолибликни кубалик Ейсон Лопес умумий ҳисобда 356 кг (даст кўтариш — 161, силтаб кўтариш — 195) натижа билан қўлга киритди. Россиялик Вячеслав Яркин — 335 кг (даст кўтариш — 152, силтаб кўтариш — 183) билан учинчи ўринни эгаллади.

Фото: iwf.net.