«Ўзбекнефтгаз» Миллий холдинг компанияси ҳамда Ўзбекистон нефть-газ ва геология ходимлари касаба уюшмалари Республика кенгаши холдингнинг янги логотипи ва шиорини яратиш бўйича очиқ танловни эълон қилди.
Танловда профессионал компания ва агентликлар билан бир қаторда хусусий шахслар ҳам иштирок этиши мумкин. Тақдим этилган ишлар ўзига хослик ва новаторлик, ғоянинг чуқур маънога эгалиги, компания фалсафаси, миссия ва қадриятларини акс эттириши ҳамда турли ташувчилар билан мослашувчанлиги каби тамойиллар асосида баҳоланади. Шиор уч тил: ўзбек, рус ва инглиз тилларига ҳам мос тушиши лозим.
Танлов комиссияси энг яхши 50 ишни танлаб олиб, финалчилар ўртасида очиқ танлов ўтказади. Танлов ғолиби совға сифатида Chevrolet Spark автомобилига эга бўлади.
Ишлар 21 июлга қадар қабул қилинади. Якуний натижалар 25 августга қадар ўтказилиб, ғолиб 30 август куни тақдирланади.
