Ўзбекистон ИИВ ЙҲХББ Тошкентда ўзларига бириктирилган автомобиллар томонидан кўп маротаба йўл ҳаракати қоидалари бузилгани учун жарималар бўйича қарздорлик белгиланган юридик шахслар рўйхатини эълон қилди.
Энг кўп қоидабузарлик «Hospital Doctor Di» МЧЖга тегишли учта Hyundai H1 автомобили томонидан содир этилган бўлиб, улар жами 43 (23+12+8) маротаба ЙҲҚни бузгани қайд қилинган. Рўйхатдан бошқа хусусий шифохоналар ҳам ўрин олган — «Doctor-Servis» МЧЖ Hyundai Starex (8 қоидабузарлик), «Doctor Profi» Hyundai H1 (7) ва «Соғлиқни сақлаш маркази» Hyundai H1 (6) автомобили билан.
Уларнинг тез ёрдам машиналари экани кўриниб турибди. Амалдаги тартиб-қоидаларга кўра, автомобилга эгалик қилаётган ташкилот қоидабузарлик тўғрисидаги маъмурий ишни бекор қилиш учун кечиктириб бўлмас хизмат вазифасини бажарганини тасдиқловчи ҳужжатларни тақдим этиши лозим.
Рейтингнинг иккинчи поғонасидан Nexia автомобили ҳайдовчиси 13 марта қоидабузарлик содир этган «Millenium Group» МЧЖ ўрин эгаллади. Учинчи ўринда— Тошкент ҳокимиятининг Epica русумли машинаси — 12 қоидабузарлик. Таъкидлаш ўринлики, ушбу машина май ойидаги ЙҲҚ бузилиши тўғрисидаги ҳисоботда ҳам келтириб ўтилган эди.
Рўйхатга жами бўлиб 62 автомобиль киритилган. ЙҲХББ жарималарни ихтиёрий равишда тўлаш бўйича қонунчиликда белгиланган 60 кунлик муддатни ўтказиб юбориш, транспорт воситаларини ушлаш ва жарима майдонларига жойлаштиришга сабаб бўлиши ҳақида огоҳлантириб ўтди.
