14−24 июнь кунлари Кипрнинг тарихий Пафос шаҳрида бўлиб ўтадиган 12-Кипр халқаро кинофестивали (CYIFF) асосий дастуридан ўзбекистонлик ёш кинорежиссёр Муҳлиса Азизова томонидан суратга олинган «У» фильми ҳам ўрин олди, деб хабар қилди Кинематографияни ривожлантириш маркази ахборот хизмати.
Мазкур кинокартина яқиндагина 70-Канн халқаро кинофестивалининг Қисқа метражли фильмлар бурчагида намойиш этилган эди.
Кинофестивалда турли мамлакатларнинг ёш киноижодкорлари томонидан яратилган 100 га яқин тўлиқ ва қисқа метражли бадиий фильмлар иштирок этиб, фестивалнинг бош соврини — «Олтин Афродита» (Golden Aphrodite) учун курашади.
Кипр халқаро кинофестивали 2006 йилдан буён ўтказилиб келинаётган бўлиб, жаҳондаги 5500 дан ортиқ фестиваллар орасида йирик 100 таликка киради.
