Ахборот ва оммавий коммуникациялар соҳасидаги Эксперт комиссияси Ўзбекистон ҳудудига олиб кириш, тайёрлаш ва тарқатиш тавсия этилмайдиган компьютер ўйинлари рўйхатини тасдиқлади, деб хабар қилди Интеллектуал мулк агентлиги матбуот хизмати.
Рўйхатга GTA: San Andreas, Mass Effect, Assasin’s Creed: Brotherhood, Fallout: New Vegas, Dead Space, Call of Duty: Black Ops, Mortal Kombat X, The Sims 3, 4 ва бошқа ўйинлар киритилган (PDF).
Хабарда қайд этилишича, лицензиат ЭҲМ учун яратилган дастурларни такрорлаш, сотиш ва прокатга бериш фаолиятини амалга оширишда муаллифлик ҳуқуқи ва турдош ҳуқуқлар тўғрисидаги қонун ҳужжатларига мажбурий риоя қилинишини ҳамда зўравонликни, порнографияни, мамлакат хавфсизлиги ва ижтимоий-сиёсий барқарорликни, фуқаролар тинчлигини, миллатлараро ва динлараро тотувликни бузишни, Ўзбекистон тўғрисида нотўғри ахборотлар тарқатилишини ҳамда унинг тарихий, маданий ва маънавий бойликлари бузиб кўрсатилишини тарғиб қилувчи ЭҲМ учун яратилган дастурларни сотишга йўл қўймасликни таъминлаши белгилаб қўйилган.
