Ўзбекистон ИИВ Йўл ҳаракати хавфсизлиги бошқармаси Тошкент чорраҳаларидаги автомат қайд этиш камералари томонидан туширилган йўл ҳаракати қоидалари бузилишига белгиланган жарималар мавжудлигини текшириш сайтини (dyhxx.uz) ишга туширди.
Ҳозирча бета-режимда фаолият олиб бораётган сайтда рўйхатдан ўтиш учун мобиль телефони рақамини (фақатгина UMS оператори) киритиши ва парол ўйлаб топиши керак. Сўнгра телефон рақамига кодли SMS келади (келгусида ҳар бир кирувчи SMS нархи 2 центни ташкил қилади).
Шахсий кабинетда қоида бузилишларини кузатиш учун давлат рақами ва техпаспорт рақами кўсатилган иккитага қадар автомобилни киритиш мумкин.
Агарда қоидабузарлик мавжуд бўлса, кабинетда жарима қўлланилиши тўғрисида қарор рақами, қоидабузарлик содир этилган сана ва жойи, қоидабузарлик тури, жарима миқдори, қоидабузарлик ҳолати ва қоидабузарлик ёпилган сана (жарима тўлангандан сўнг) кўрсатилади. Қарор нусхасини юклаб олиш мумкин.
Мазкур хизмат Technologic ASBT компанияси томонидан ишлаб чиқилган. Мазкур компания Oberthur Technologies ва Thales билан биргаликда Ўзбекистонда биометрик паспорт тизимини жорий этиш лойиҳасида қатнашган.
UMS абонентлари жарималар мавжудлиги ҳақида SMS орқали ҳам бохабар бўлишлари мумкин. Бунда ҳар бир кирувчи хабар нархи 5 центни ташкил этади.
