Алишер Навоий номидаги Ўзбекистон Миллий боғи ҳудудида Адиблар хиёбонини барпо этилади. Президент Шавкат Мирзиёев 18 апрель куни шу ҳақдаги қарорни имзолади.
Хиёбонга Ҳамид Олимжон, Ғафур Ғулом ва Зулфия ҳайкаллари кўчирилади. Бундан ташқари, ўзбек миллий адабиётининг улкан намояндалари: Озод Шарафиддинов, Эркин Воҳидов, Абдулла Орипов ва Муҳаммад Юсуф хотирасига бағишланган ёдгорлик мажмуаларини барпо этиш бўйича ижодий танлов ўтказилади.
1991 йили Миллий боғ ҳудудида буюк шоир ва мутафаккир Алишер Навоий ҳайкали барпо этилган эди. Ушбу ҳудудда 2007 йили Абдулла Қаҳҳор, 2010 йили Ойбек, 2013 йили Саид Аҳмад ва Саида Зуннунова хотираларига бағишлаб ёдгорлик мажмуалари ўрнатилди.
Шунингдек, боғ ҳудудида Ўзбекистон Ёзувчилар уюшмаси учун замонавий янги бино қуриш назарда тутилган. Мазкур ҳудудда жойлашган Ўзбекистон маданияти ва санъати кўргазмаси биноси Ёзувчилар уюшмаси тасарруфига ўтказилиб, бу ерда доимий равишда китоблар кўргазмалари ва тақдимотлари, турли адабий-маърифий тадбирлар ўтказиладиган адабий марказ ташкил этилади.
Қарор «Миллий боғни халқимиз, авваламбор, ёшларимизнинг маданий-маърифий савиясини юксалтиришга хизмат қиладиган» масканга айлантириш сингари мақсадларга йўналтирилган.
