Ўзбекистон Президенти Шавкат Мирзиёев Самарқандга сафари вақтида янги трамвай йўналиши билан танишди. Бу ҳақда «Ўзбекистон темир йўллари» АЖ ахборот хизмати хабар қилди.

Линиянинг умумий узунлиги 34,8 км бўлиб, унда тўртта йўналиш мавжуд. Биринчи босқичда 11,4 км лик темир излар ётқизилади. Бугунги кунгача 7,2 км лик участка қуриб тамомланди.

«Ўзбекистон темир йўллари» бошқаруви раисининг биринчи ўринбосари Акбар Шукуровнинг таъкидлашича, янги йўналишда Темирйўл вокзали — Сартепа йўналиши бўйича трамвай қатнови йўлга қўйилади. Жадвалга кўра 6:00 дан 23:00 га қадар йўловчиларга хизмат кўрсатилади. Линияда 7 дақиқа оралиқда саккизта таркиб ҳаракатланади. Трамвай линияси бўйлаб автобус бекатлари билан бирлаштирилган 26 та бекат қурилди.

Айни пайтда вокзалдан Сиёб бозорига қадар 5 км лик линияни ётқизиш ишлари давом эттирилмоқда. Мазкур участкада трамвайларга хизмат кўрсатиш учун Рўдакий ва Гагарин кўчалари чорраҳасида депо қурилмоқда. Трамвай ҳаракати учун электр энергиясини тўртта таянч подстанция орқали етказиб бериш режалаштирилган.

Кейинги босқичда 23,4 км трамвай линияси ётқизилади. Биринчи навбатда Спитамен кўчаси орқали вокзалдан Кимёгарлар шаҳарчасигача бўлган тармоқ бунёд этилади. Кейин эса Нарпай кўчаси орқали вокзалдан Кимёгарлар шаҳарчасига трамвай линияси етказилади.

Линиядаги ишлар учун Тошкентда фаолият кўрсатган ҳайдовчилар жалб этилди. Бундан ташқари, 20 дан зиёд ҳайдовчи ва линияга хизмат кўрсатиш бўйича мутахассис тайёрланди. Жами бўлиб 43 киши ишга қабул қилинди. Самарқанд депоси қошида Трамвай ҳайдовчиларини тайёрлаш маркази очилди.