Шу кунларда Қорақалпоғистоннинг Мўйноқ тумани ҳудудида жойлашган Судочье кўллар тизимида кўп сонли пушти фламинголар тўдаларини кузатиш мумкин.

Умумий майдони 50 минг гектардан ошадиган ушбу кўллар тизимида ҳозирда 230дан ортиқ турдаги минглаб кўчманчи ва доимий яшовчи қушлар мавжуд.

Судочье кўли ўзининг жойлашиши бўйича Сибирь ва Тундрадан жанубга ва жанубий-шарқга, иссиқ мамлакатларга ва орқага учадиган трансконтинентал мигрант қушларнинг ғарбий-осиё миграцион йўлида жойлашган. Мазкур кўл Қорақалпоғистоннинг шимолий-ғарбида жойлашган бўлиб, бир неча кўллар тизимидан ташкил топган (кичик ва катта Судочье, Қаратерен, Бегдулла айдин, Омар салим, Қаражар, Ақушпа ва ҳ.). Бу кўллар тизими қушларнинг уя қўйиш, учуб ўтувчи қушларнинг дам олиш, учиш олдидан озиқланиш ўрни бўлиб хизмат қилади.

Судочье кўллар тизимида Ўзбекистон Қизил китобига кирган 40 турдаги қушнинг 30 тури, Табиатни муҳофаза қилиш Халқаро ташкилотининг «Йўқ бўлиб кетиш хавфи остидаги турларнинг Қизил рўйхати"га киритилган 24 турдаги қушнинг 18 тури яшайди.

Ана шундай қизил китобга кирган қушларнинг бири — фламинго қушининг тўдаси кейинги 10 йил ичида Судочье кўлида пайдо бўлди. Ўзининг cўлим табиати, гўзал манзараси билан нафақат маҳаллий аҳолининг, балки хорижий туристларнинг ҳам эътиборини қозониб келаётган «Судочье» кўллар тизимида табиатда ноёб саналадиган пушти фламинго қушларининг мавжудлиги ва ушбу қушнинг шу жойда уяларининг топилгани республика орнитолог-олимларининг катта илмий кашфиёти бўлди.

«Кейинги ўн йилликларда Жанубий Орол атрофида фламингонинг учраши сезиларли даражада юқорилади, — дея тасдиқлайди ёш орнитолог-олим Исламбек Арепбаев. — Бу жойда фламинго учиб ўтувчи қуш тури сифатида белгили. Лекин, 2014 йили 23 май куни Судочье кўллар тизимида олиб борилган орнитологик тадқиқотлар вақтида кўлнинг шарқий чегарасидаги кичикроқ оролда фламингонинг катта уяловчи колонияси топилди. Бу ҳақиқий илмий янгилик бўлди. Биз оролда фламингонинг 7000 особи ва 3000 га яқин уясини санадик. Бу Ўзбекистондаги энг катта колония бўлиб, у бутун дунёдаги популяциянинг 1,4 фоизини ташкил қилади».

Қуйида Қорақалпоғистон Вазирлар Кенгаши ахборот хизмати томонидан эълон қилинган суратларни эътиборингизга ҳавола этамиз.

Фото