Ўзбекистон ички ишлар вазири Хоразм ва Бухоро вилоятларига янги ИИБ бошлиқларини тайинлади, деб хабар қилди ИИВнинг «Постда» газетаси.

Хоразм вилояти ИИБ бошлиғи лавозимига полковник Шавкат Раҳмонов тайинланди. Бунга қадар мазкур лавозимда 18 март куни Ўзбекистон фавқулодда вазиятлар вазири этиб тайинланган Рустам Жўраев фаолият кўрсатган.

Бухоро вилояти ИИБга подполковник Шуҳрат Алиев бошлиқ бўлди.

Бундан ташқари, икки вилоятда ИИБ бошлиғи ўринбосари — йўл ҳаракати хавфсизлиги бошқармаси бошлиқлари ҳам ўзгарди. Андижон вилоятида мазкур лавозимга подполковник Сирожиддин Назирхонов, Наманган вилоятида эса подполковник Омонжон Тожибоев тайинланди.

Тошкент вилояти ИИБда бошлиқнинг биринчи ўринбосари — Жиноят қидирув ва терроризмга қарши кураш бошқармаси бошлиғи лавозимига подполковник Саидкарим Алимов тайинланди.