UMS мобил алоқа операторининг бош директори Сражитдин Фахрутдинов бўлди.
Сражитдин Фахрутдинов — Тошкент электротехника алоқа институти битирувчиси (1978−1983 йй.), ихтисослиги бўйича алоқа муҳандиси. UMS бош директори лавозимига тайинланишидан олдин «Ўзбектелеком» АК таркибига кирувчи, телекоммуникация ускуналарини ишлаб чиқарувчи, алоқа ва телекоммуникация тизимларида фойдаланишга мўлжалланган электрон-техник маҳсулотларини мамлакатимизда тадқиқ қилиш, лойиҳалаштириш ва ишлаб чиқаришга ихтисослашган корхона TELMAX ELECTRONIKS МЧЖга раҳбарлик қилган. Аввалроқ «Коинот» ОАЖни ҳам бошқарган.
«Икки йилдан кўпроқ фаолияти давомида UMS ривожланишнинг зарур поғонасига етди ва қатъий рақобат шароитида аҳолига керакли маҳсулот ва хизматларни тақдим этиб келмоқда. Компания ўз ривожланиш стратегиясини амалга оширишни давом этади ва Ўзбекистон ҳудудларига кириб боришни кенгайтириш, алоқа ва интернет сифатини янада ошириш, мижозларбоп таклифларни ишлаб чиқиш ва жорий қилишга алоҳида эътибор қаратади. Ишончим комилки, ўз ишининг профессионалларидан ташкил топган жамоа билан нафақат белгиланган марраларни эгаллаймиз, балки бардавом ривожланиш учун асос яратамиз», — дея изоҳ берди Сражитдин Фахрутдинов.
UMS МЧЖнинг техник директори этиб Собир Арипов тайинланди.
Собир Арипов Тошкент электротехника алоқа институтини «Телекоммуникациялар» ихтисослиги бўйича битирган (1996−2002 йй.). UMS МЧЖга келишидан аввал Huawei Tech Investment Tashkent МЧЖ директор ўринбосари бўлиб ишлаган. Ҳар хил йиллар давомида компаниянинг бизнес-режалаштириш бўйича бўлим, маркетинг йўналишига раҳбарлик қилган. Ундан аввал Huawei Technologies (ХХР) компаниясининг ваколататхоналарини очиш ҳамда Марказий Осиё ва Шарқий Европа мамлакатларида бизнесни ривожлантириш бўйича мутахассис бўлиб ишлаган.
«Ўтган йиллар давомида UMS база станциялари сонини кескин кўпайтирди, республика бўйича хизмат кўрсатиш доираларини кенгайтирди ва бу орқали мобил алоқанинг юқори сифатини таъминлади. Ҳозирги кунларда компания техник жиҳатдан жуда катта марраларга эришишни кўзламоқда. Тармоқ радиоқамрови ҳудудини янада кенгайтириш ва хизматларимиздан иложи борича кўпроқ аҳоли фойдалана олишга шароит яратиш бўйича кенг қўламдаги дастур амалга оширилмоқда. Шу билан бирга тармоқни ривожлантириш учун энг замонавий технологияларни татбиқ қилиш, тармоққа тушаётган оғирлик ортаётган шароитда овозли алоқа ва маълумотлар узатиш сифатини яхшилаш ишлари давом этмоқда», — дея таъкидлади Собир Арипов.
Universal Mobile Systems компанияси 2014 йилнинг 1 декабрида тижорий фаолият бошлаган. Компания таъсисчиси -Ўзбекистон Республикаси Ахборот технологиялари ва коммуникацияларини ривожлантириш вазирлиги қошидаги «Радиоалоқа, радиоэшиттириш ва телевидение» ДУК.
