Uzbekistan GTL корхонаси синтетик ёқилғи ишлаб чиқариш бўйича завод қурилишига киришди, дейилади лойиҳа расмий сайтига жойлаштирилган хабарда.

Uzbekistan GTL пудратчилар консорциумини суюқ синтетик ёқилғи ишлаб чиқариш бўйича «OLTIN YO’L GTL» заводи қурилишини давом эттириш ишлари бошлангани тўғрисида хабардор қилган.

Юборилган хабарномада батафсил лойиҳавий ечимларни ишлаб чиқиш, харидларни ташкил этиш ва Қашқадарё вилоятидаги қурилиш майдончасида асосий қурилиш-монтаж ишларини бошлаш назарда тутилган.

2016 йил сўнгида Ўзбекистон Президентининг ««Шўртан ГКМ метан тозалаш базасида синтетик суюқ ёқилғи ишлаб чиқариш» инвестицион лойиҳасини амалга ошириш бўйича қўшимча чора-тадбирлар тўғрисида"ги қарори қабул қилинган эди.

Аввал хабар қилинганидек, GTL заводи қиймати 4 млрд долларга яқинроқни ташкил этади. Тозаланган метан газидан синтетик суюқ ёқилғи ишлаб чиқариш (gas-to-liquid, GTL технологияси) бўйича завод Sasol технологияси асосида фаолият олиб боради. Лойиҳа Ўзбекистонда қазиб олинадиган газдан ички бозор ва экспорт учун йилига 1,5 миллион тонна дизель ёқилғиси, керосин, нафт ва сиқилган нефть гази ишлаб чиқаришга имкон беради.