Ўзбекистон Президентининг 21 декабрдаги қарори билан 2017−2019 йилларда тўқимачилик ва тикув-трикотаж саноатини янада ривожлантириш чора-тадбирлари дастури тасдиқланди.

Ҳужжат тўқимачилик ва тикув-трикотаж саноатини модернизациялаш, диверсификациялаш ва жадал ривожлантиришни таъминлаш, пахта толаси ва ипак хом ашёсини чуқур қайта ишлаш, хорижий инвестицияларни кенг жалб этиш йўли билан рақобатбардошли, ташқи бозорларда талаб қилинадиган тайёр, экспортга йўналтирилган маҳсулотлар ишлаб чиқариш ҳажмлари ва турларини кенгайтиришга қаратилган.

Қарор билан пахта толаси ва ипак хом ашёсини чуқур қайта ишлаш орқали юқори қўшилган қийматли, ташқи бозорларда талаб юқори бўлган тайёр тўқимачилик ва тикув-трикотаж маҳсулотларини ишлаб чиқариш мезонлари, шунингдек, шундай маҳсулотларни ишлаб чиқариш бўйича инвестицион лойиҳалар рўйхати тасдиқланган (мезон ва рўйхат келтирилмаган).

Хорижий инвестициялардан ташқари, лойиҳаларга Ўзбекистон тижорат банкларини тижорат банклари устав капиталига, шу жумладан шўъба инвестиция компаниялари орқали ёки модернизация қилинаётган ёхуд янгидан ташкил этилаётган корхоналарга қайта молиялаштирилаётган кредитлар бериш орқали жалб қилиш таклиф этилмоқда.

1 январдан бошлаб тўқимачилик ва тикув-трикотаж тармоғининг ноозиқ-овқат истеъмол товарлари экспортидан олинган хорижий валютадаги тушумнинг бир қисмини ваколатли банкларга мажбурий сотиш бекор қилинди.

2020 йилга қадар республикада ишлаб чиқарилмайдиган, Вазирлар Маҳкамаси томонидан тасдиқланадиган рўйхат бўйича четдан келтириладиган технологик асбоб-ускуналар, бутловчи буюмлар ва эҳтиёт қисмлар, тўқимачилик ва тикув-трикотаж тармоғининг ўрнатилган технологик ускуналарига эҳтиёт қисмлар ва бутловчи буюмлар (улар ҳам рўйхат асосида) божхона тўловларидан (божхонада расмийлаштириш йиғимлари бундан мустасно) озод қилинади.

Худди шу муддатда тармоқнинг қатор ноозиқ-овқат истеъмол товарларини ишлаб чиқаришга ихтисослашган корхоналарига солиқ ва божхона имтиёзлари ҳамда преференциялар тақдим этилди.