Жанубий Кореянинг Hyundai Engineering ва Hyundai Engineering & Construction компаниялари консорциуми Тахиатош ИЭСни модернизация қилиш бўйича тендерда ғолиб бўлди, дея хабар қилди «Ўзбекэнерго» АЖ.

Консорциум «Тахиатош ТЭСда қуввати 230−280 МВт бўлган иккита буғ-газ ускунаси (БГУ) қурилиши» лойиҳаси бўйича халқаро танловда 457 млн доллар таклиф этган ҳолда ғолиб чиқди. 2015 йил декабрида эълон қилинган танловда Хитой, Жанубий Корея ва Туркиядан 10 талабгор иштирок этди.
Модернизация муддати 2,5 йилни ташкил этиб, бунда эскирган блоклар фойдаланишдан чиқарилади. Шартномани декабрь сўнгига қадар имзолаш режалаштирилган.
Умумий қиймати 678,2 млн доллар бўлган лойиҳа Осиё тараққиёт банкининг 300 млн долларлик кредити, Ўзбекистон Тикланиш ва тараққиёт жамғармасининг 230,7 млн долларлик маблағи ва «Ўзбекэнерго"нинг шахсий маблағлари эвазига амалга оширилади.
Тахиатош ГЭСнинг ўрнатилган қуввати 730 МВт бўлиб, биринчи энергоблок 1956, охиргиси (бешинчиси) 1967 йилда ўрнатилган. Электростанция республиканинг шимоли-ғарбий қисмлари — Қорақалпоғистон Республикаси ва Хоразм вилоятини электр энергияси билан таъминлайди.