Ўзбекистоннинг сайланган Президенти Шавкат Мирзиёев инаугурацияси чоршанба куни бўлиб ўтади, дея хабар қилди UzDaily.uz.

Шу куни Қонунчилик палатаси ва Олий Мажлис Сенатининг қўшма йиғилиши бўлиб ўтади. Унда Шавкат Мирзиёев тантанали равишда қасамёд қабул қилиб, Марказий сайлов комиссияси раиси Мирзо Улуғбек Абдусаломов қўлидан тегишли гувоҳномани олади.

Шунингдек, йиғилишда депутат ва сенаторлар Ўзбекистон бош вазири лавозимига Абдулла Арипов номзодини кўриб чиқади.

Шавкат Мирзиёев 4 декабрь куни бўлиб ўтган Президент сайловида 88,16 фоиз овоз тўплаган ҳолда ғолиб чиқди.

12 декабрь куни эса парламентда кўпчилик овозга эга бўлган Ўзбекистон Либерал-демократик партияси (ЎзЛиДеП) Президентга Абдулла Арипов номзодини бош вазирликка кўриб чиқиш учун тақдим этиш тўғрисидаги қарорни қабул қилган эди.