Ўзбекистон Олий Мажлиси Қонунчилик палатаси иккинчи ўқишда «Коррупцияга қарши курашиш тўғрисида"ги қонунни қабул қилди, дея хабар қилди палата ахборот хизмати. Эндиликда қонун Сенат томонидан тасдиқланиши лозим.
Қабул қилинган қонун биринчи навбатда фуқаролар жумладан, тадбиркорларнинг давлат органлари ва уларнинг мансабдор шахсларига ишончини мустаҳкамлаш, мамлакатнинг инвестициявий жозибадорлигини оширишга қаратилган.
Қонун коррупцияга қарши курашиш соҳасидаги ҳуқуқий муносабатларни кенг кўламда қонун йўли билан тартибга солиб, коррупцияга қарши курашиш борасида давлат органлари, ташкилотлар ва фуқаролик жамияти институтлари томонидан амалга оширилаётган чора-тадбирлар самарадорлигини оширади.
Якуний мақсад — жамият ҳаётининг барча соҳаларида бундай ҳолатга тўлиқ барҳам бериш, жамиятда фуқароларнинг ҳуқуқий онги ва ҳуқуқий маданиятини ошириш орқали коррупциянинг барча кўринишларига нисбатан мурасасизлик муҳитини яратишдан иборат.
Эслатиб ўтамиз, «Коррупцияга қарши курашиш тўғрисида"ги қонун лойиҳаси октябрь ойи ўртасида парламентга Президент вазифасини бажарувчи Шавкат Мирзиёев томонидан давлат раҳбарининг қонунчилик ташаббуси сифатида киритилган эди.
