Ўзбекистон Президенти в. б. Шавкат Мирзиёев «Халқаро меҳнат ташкилотларининг бирлашмалар эркинлиги ва касаба уюшмаларига бирлашиш ҳуқуқини ҳимоя қилиш тўғрисидаги 87-сонли Конвенциясини (Сан-Франциско, 1948 йил 9 июль) ратификация қилиш ҳақида"ги Қонунни имзолади. Қонун 6 октябрда Қонунчилик палатаси томонидан қабул қилиниб, 12 октябрда Сенат тасдиғидан ўтган эди.
Конвенция 1948 йилда Халқаро меҳнат ташкилоти (ХМТ) Бош Конференциясининг 31-сессиясида қабул қилинган ва 1950 йилда кучга кирган. Мазкур ҳужжат 153 мамлакат томонидан ратификация қилинган.
Конвенцияда ходимлар ва иш берувчиларнинг ташкилотлар тузиш, шунингдек, ушбу ташкилотларга кириш ҳуқуқи, ходимлар ва иш берувчи ташкилотларининг ўз уставлари ва маъмурий регламентларини ишлаб чиқиши, давлат органларининг бирлашиш ҳуқуқини чекловчи ёки уни қонуний амалга оширишга тўсқинлик қилувчи аралашувидан эркинлик, ходимлар ва иш берувчи ташкилотларни тарқатиб юборишни ёки маъмурий тартибда улар фаолиятини тўхтатиб қўйишни таъқиқлаш, ходимлар ва иш берувчиларга бирлашиш ҳуқуқини эркин амалга ошириш кўзда тутилган.
ХМТ 87-сонли Конвенциясининг ратификация қилиниши Ўзбекистоннинг халқаро ташкилотларга янада интеграциялашуви ҳамда ходимлар ва иш берувчилар манфаатлари ҳимоясини халқаро стандартларга мувофиқ таъминлашни янада такомиллаштиришга хизмат қилади.
