Япониянинг Mitsubishi Corporation компанияси Тўрақўрғон иссиқлик электростанцияси (ИЭС)нинг иккита энерния блоки қурилиши бўйича ўтказилган тендерда ғолиб чиқди, хабар қилмоқда «Ўзбекэнерго».
Хабарда келтирилишича, Наманган вилояти Тўрақўрғон туманида таркибида ҳар бирининг қуввати 450 МВт дан бўлган иккита буғ-газ ускунасига эга умумий қуввати 900 МВт ни ташкил этувчи янги иссиқлик электростанцияси қурилиши бўйича лойиҳа юзасидан ўтказилган тендерда Япониянинг Mitsubishi Corporation корпорацияси бош пудратчи сифатида танлаб олинди. Айни пайтда шартномавий музокараларга тайёргарлик ишлари олиб борилмоқда.
«Ўзбекэнерго» Тўрақўрғон ИЭС қурилиши ишларига 2013 йилнинг августида киришган эди. Лойиҳада йилига 7 миллиард кВтс электр энергиясини ишлаб чиқарадиган электростанция барпо этилиши кўзда тутилган.
Умумий қиймати 1,1 млрд доллар бўлган лойиҳа Япония Халқаро ҳамкорлик агентлиги (JICA)нинг 704 млрд долларлик, Ўзбекистон Реконструкция ва тараққиёт жамғармасининг 300 млн долларлик кредитлари ва «Ўзбекэнерго"нинг хусусий маблағлари ҳисобига амалга оширилади.
Бундан аввалроқ Япониянинг Mitsubishi ва Mitsubishi Hitachi Power Systems компаниялари Навоий ИЭСни модернизация қилиш бўйича «Ўзбекэнерго» билан шартнома имзолагани маълум бўлган эди. Умумий қиймати 550 млн долларга яқин бўлган лойиҳа доирасида 450 МВт қувватга эга битта БГУ қурилиши кўзда тутилган. Амалга ошириш муддати уч йилни ташкил этади.
