Тошкентнинг Яшнобод туманида 7 октябрь куни Ўзбекистоннинг биринчи Президенти Ислом Каримов шарафига «Ислом ота» деб номланган масжид очилиши бўлиб ўтди.
Муқаддам «Жўрабек» номи билан аталган масжид 2015 йил апрел ойи сўнгидаги ёнғиндан зарар кўрган эди. Мамлакат Мусулмонлар идораси сайтида хабар қилинишича, масжидга янги ном беришда кенг жамоатчилик таклиф ва истаклари инобатга олинди.
Мингдан ортиқ меҳмон ташриф буюрган масжиднинг очилиш маросими Қуръон тиловати билан бошланди. Ўзбекистон мусулмонлари идораси раиси, муфтий Усмонхон Алимов мамлакат мусулмонларини янги очилган масжид билан муборакбод этди.
Масжид ҳузурида илк бор кутубхона ташкил этилди. Ушбу кутубхона чоп этилаётган янги нашрлар билан бирга, қўлёзма ҳамда нодир манбалар билан ҳам бойитилди. Шунингдек, масжидда турли маънавий-маданий тадбирларни ўтказишга мўлжалланган 80 кишилик мажлислар зали ҳам қурилди.
