Тошкентда «Олмазар» метро станциясидан Сергели туманининг «Йўлдош» мавзесига қадар давом этадиган ер усти метро тармоғи қурилиши тўрт йил давом этади. Бу ҳақда чоршанба куни Сергели туман ҳокими Фурқат Мақсудхўжаев матбуот анжуманида маълум қилди.
Пойтахт метрополитенининг Чилонзор йўналиши давоми қурилишини лойиҳалаштиришни тезлаштириш вазифаси Ўзбекистон Президенти в. б. Шавкат Мирзиёевнинг 25 сентябрда туманга ташрифи чоғида қўйилган эди.
Фото: Сергели туман ҳокимлиги / «Газета.uz».
Фурқат Мақсудхўжаевнинг аниқлик киритишича, янги йўналиш узунлиги 8 км ни ташкил этиб, унда олтита станция фаолият кўрсатади. Тармоқнинг 6 километри ер устида жойлашади.
Йўналиш Чоштепа, Мирзо Турсунзода ва Қипчоқ кўчалари бўйлаб «Йулдош» мавзесидаги Марли кўчасига қадар давом этади. Қурилиш ишлари жорий йилда лойиҳа ишланмаси якунланиши биланоқ бошланади.
Фото: Сергели туман ҳокимлиги / «Газета.uz».
Туман ҳокимининг қўшимча қилишича, бир вақтнинг ўзида Қипчоқ кўчасида Тошкент ҳалқа автомобиль йўлига олиб чиқувчи темир йўл ўтказгичи бўлган 12-қаторли 10 километрлик янги автомобиль йўли қурилиши ҳам бошланади.
