Тошкентда Кичик бизнес ва хусусий тадбиркорлик субъектларининг экспортини қўллаб-қувватлаш жамғармаси Болгариянинг «Another Point Adviser Co. Ltd» компанияси билан ушбу мамлакатда ўз ваколатхонасини очиш тўғрисида шартнома имзолади, хабар қилди ЎзА.
Жамғарманинг Болгария Республикасида ташкил этилаётган ваколатхонаси ўзбекистонлик тадбиркорларга ушбу мамлакат бозорини ўрганиш асосида ўз маҳсулотларини экспорт қилиш, ишончли ҳамкорлар топиш, ўзбек ва болгар ишбилармон доиралари ўртасида ҳамкорликни ривожлантириш, Ўзбекистон тадбиркорларининг Болгарияда ўтказиладиган кўргазмалар, ярмаркалар, тендер савдолари ва бизнес-форумларда иштирокини ташкил этишга кўмаклашади.
Бундан ташқари, ваколатхона Ўзбекистон экспортчиларига Болгарияда божхона тартиб-таомилларидан ўтиши учун зарур сертификатлар, лицензия ва бошқа рухсат берувчи ҳужжатларни олишга ёрдам беради.
Кичик бизнес ва хусусий тадбиркорлик субъектларининг экспортини қўллаб-қувватлаш жамғармаси 2013 йилда ташкил этилган. 2015 йилда жамғарма 3212 нафар тадбиркорга кўмаклашди, 2016 йил якунига қадар ушбу кўрсаткични 4000 га қадар ошириш режалаштирилган. Мазкур субъектлар экспорти ҳажми ўтган йилда 1,045 млрд АҚШ долларини ташкил этган бўлса, жорий йилда кўрсаткичнинг 1,5 млрд долларга етиши кутилмоқда.
